Khakhathi Murida o vhuya kha bepha ḽa Phalaphala FM Royal Heritage.

Tshiṱori nga Elmon Tshikhudo. Ṱhalutshedzo nga Khathutshelo Raliphaswa.

Ḽidzhakanḓila kha zwa muzika, ramuzika wa raggea Khakhathi Tshisikule, ane a ḓivhea khwine nga ḽa Murida kha vhatevheli vhawe, ndi muṅwe wa vhaimbi vhane vha ḓo mbvumbvusa vhathu kha bepha ḽa ṅwaha uno ḽa Phalaphala FM Royal Heritage.

Khakhathi ndi ramuzika ane a ḓivhelwa nyimbo dzawe dzau sasaladza nau lwa nau usa lingana ha zwithu na maimo tshitshavhani. Mbvumbo ya Khakhathi yau amba mihumbulo yawe, zwo vhuya zwa swika kha he vhane vha vhuṱambo na mabepha vha ofhe u mu vhidza mabephani awe sa izwi vha tshivha vha khou ofha u ṱutshelwa nga vhalambedzi. Nḓila ya maitele awe nau amba nga ha zwiito zwi songo teaho u fana na zwiito zwa tshanḓa nguvhoni mivhusoni zwo ita uri a lozwe zwikhala zwau vhidzwa kha dzi mbekanyamushumo dza mivhuso na maṅwe madzhendedzi.

Ḽiṅwe ḽa mabepha he a valelwa nga nnḓa lwa minwaha minzhi ndi bepha ḽa Phalaphala FM Royal Heritage. Ramuzika uyu, ane o no anḓadza dzi aḽibamu dza tshivhalo lwa minwaha kha budo ḽawe, o guma u mbvumbvusa vhathu kha bepha iḽo nga 2015. Ubva ṅwaha uyo, hango tsha vha muṅwe wa vhoramuzika vha mutevhe wa vhambvumbvusi kha bepha iḽo, sa izwi o kundelwa u tevhedza nḓila ye zwithu zwovha zwo dzudzanywa ngayo kha sia ḽa mizika ine yo ṱanganedzwa bephani iḽo ḽa Phalaphala FM Royal Heritage.

Nga murahu ha minwaha ya ṱahe, Murida u khou vhuya hafhu bephani, husina zwine o vhofhwa ngazwo kha thendelano navho. U ḓo mbvumbvusa vhathu e na vhoramuzika vha fanaho na ramuzika wa tshingondo Zozo, ramuzika wa reggae Colbert Mukwevho, mulidzi wa katara na muimbi Vusi Mahlasela, na vhaṅwe vhoramuzika vhabvaho Tshitirikitsha vhembe.

Bepha iḽo ḽi ḓo farelwa damuni ḽa Nandoni nga ḽa fumi-iṋa Khubvumedzi ṅwaha uno.

Murida o amba zwauri ha tou ḓivha zwavhuḓi uri ndi ngani ṅwaha uno o rambiwa kha bepha iḽi. “Athi athu u shanduka nḓila dzanga kha sia ḽau imba na kumbvumbvusele kwanga. Vhathu vha nga tou lavhelela u mbvumbvuswa nga nḓila ine vha ḓo sala vho fushea sa izwi ndi tshe onoula Khakhathi wa kale na kale,” a amba.

Murida, ane asi kale o anḓadza aḽibamu ntswa ya Rifhe Maanda, o livhuwa vhadzudzanyi vha bepha nga kha nḓila ye vha ita zwithu ngayo ṅwaha uno. “Ndi tenda zwauri ndi nḓila yavhuḓi siani ḽa vhubindudzi nga vhadzudzanyi na kha nṋe. Ro swika kha ḽithihi, hone ndo takala uri ahuna zwine zwa khou thivhela tshithu kha sia ḽanga. Ndi ḓo mbvumbvusa vhathu nga nyimbo dzanga dza kale na dzine dzavha hone kha aḽibamu yanga ntswa. Athi athu u shanduka. Didinngwe aḽi shanduki mavhala. Vhathu a vha swike vha vhone zwine avha athu u zwi vhona luvhanḓeni,” Murida a amba.

Nga nnḓa ha uvha ramuzika a ḓivheaho, Murida ndi ramabindu na muimeleli wa vhathu ane a shela mulenzhe zwihulu kha zwipiḓa zwinzhi tshitshavhani. Asi kale o ita zwau farana zwanḓa na vha Phalaphala FM kha mishumo yavho kana fulo ḽau gwa magwedzho mivhunduni hune ahuna maḓi kha vhupo ha Vhembe, hune ha shumiswa zwishumiswa zwa Murida.

Date:20 August 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 164