Muhwelelwa u khou rumela milaedza yau shushedza e dzhele

Tshiṱori nga Victor Mukwevho. Ṱhalutshedzo nga Khathutshelo Raliphaswa.

Muhwelelwa kha bulayo o lindelaho tsengo o vhonala a khou sema nau shushedza vhoramafhungo, vhe vha ḓou mu foda zwinepe, musi etsengoni ngei khothe ya Thohoyandou. Zwauri muhwelela uyo o kona hani uvha na ṱhingokhwalwa a kona nau vhona zwine zwa khou itea kha zwileludzi zwa vhudavhidzani ndi zwine vhathu vhanzhi vha khou ḓi vhudzisa.

Azwidowi Gadisi, maine ane a ḓivhea nau ṱhonifhiwa a bvaho kha muvhundu wa Khubvi, oḓi vhonadza khothe ya madzhisiṱiraṱa wa Ṱhohoyandou nga Ḽavhuraru ḽa sumbe Ṱhangule. U khou hweswa mulandu wau rwa na uvhulha mufumakadzi wawe, Nyelisani Phathutshedzo Masakona, wa minwaha ya 32, a lovha zwe zwa itea nga ḽa fumbili-sumbe Fulwana ṅwaha uno. Ndi he ari musi ono ita zwiito izwo, a ḓou ḓi vhiga mapholisani.

Vhege ye ya rangela u vhulawa ha mufumakadzi uyo, Gadisi o ḓou vhonala a khou ita ṱhoho dza mafhungo kha zwileludzi zwa vhudavhidzani zwi tshi tevhela zwe a anḓadza vidio ya u sumbedza masheleni o ḓalaho vhukuma. O amba zwauri ene u maine are na maanḓa manzhi vhukuma, hone ua kona u thusa vhafumakadzi vha muumba uri vha kone uvha na vhana hone ua kona uri a renge kholomo dza fumi nga masheleni ane a a shuma nga ḓuvha ḽithihi fhedzi.

Zworalo uvha hone ha Gadisi kha zwileludzi zwa vhudavhidzani azwingo ḓou guma musi a tshi farwa. Vhege yo fhiraho nga Ḽavhuna, ho tou fhela ḓuvha fhedzi musi oḓi vhonadza khothe, o ḓou thoma u anḓadza kha zwileludzi zwa vhudavhidzani a tshi semana nau shushedza kha yone Facebook. U sinyuwa hawe zwovha zwo livhiswa kha vhoramafhungo vhe vha ḓou mu foda zwinepe musi e khothe.

Kha muṅwe wa milaedza yawe, Gadisi o ṱahisa vhoramafhungo vha nyanḓadza mafhungo ya Limpopo Mirror sa “tshiḓaela tshine tsha fana na muri wa muvhuyu u songo dzudzanyeaho tshivhumbeo”.

Mbudziso yauri naa muthu are sentharani ya ndulamiso u kona hani uvha na ṱhingokhwalwa na uvha kha zwileludzi zwa vhudavhidzani ndi ine vhanzhi avha athu u wana phindulo. Ro lingedza u wana muambeli wa muhasho wa senthara ya ndulamiso wa vunḓu, Vho Tshidi Mapole, fhedzi ro kundelwa u vha wana musi ri tshi ṅwala nau anḓadza tshiṱori itshi.

Zworalo vhalindi vha dzhele ya Ṱhohoyanḓou, ine ya wanala Vondwe, vho bveledza zwauri vhafariwa vhanzhi vha na ṱhingokhwalwa na zwiṅwe zwishumiswa. Musi vha tshi vhudziswa uri vhafariwa vha kona hani uvha na zwishumiswa izwo musi vhe dzhele, mulindi muthihi, e a hana u bulwa dzina, o amba zwauri vhunzhi hazwo zwi ḓiswa nga vhalindi vha dzhele vhane vha ita zwiito zwa tshanḓa nguvhoni. “Zwiṅwe zwi ḓiswa nga vhathu vho ḓa u dalela vhafariwa zwine vha zwi vhea nga ngomu ha zwiḽiwa, ngeno zwiṅwe zwi tshi poswa nga ṱhama dza vhafariwa vhusiku. Vhalindi vhane vha ita zwa tshanḓa nguvhoni ngau shumisana navho vha mbo zwi doba nga matsheloni vha isa kha vhafariwa,” vha amba.

Musi Gadisi atshi ḓi vhonadza khothe nga Ḽavhuraru ḽa vhege yo fhiraho, ovha o tou zondolola vhoramafhungo. Mulandu wawe wo fhiriselwa phanḓa kha ḽa fumbili-rathi Ṱhangule.

Date:16 August 2024

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 184