U anda hau tswiwa ha zwifuwo zwi khou vhilaedza

Tshiṱori nga Kaizer Nengovhela. Ṱhalutshedzo nga Khathutshelo Raliphaswa.

Vhafuwi wa zwifuwo vha bvaho Hamakhithi vho sala vho vhaisala musi vha tshi wana masalela a kholomo dzavho, dze dzavha dzo tswiwa dza ṱhavhiwa nga mavemu vhege yo fhiraho.

Uya nga Vho Thomas Tshikota, vho sia zwifuwo zwavho zwi tshi fula masimuni tsini na Hamadodonga kha vhupo ha Sinthumule. Vhori vha tshi vhuya  nga murahu, vha wana uri zwiṅwe zwifuwo zwo no ngalangala. Nga murahu hau sedzesa vhuponi uho, vho ḓou wana masalela a nthihi ya dzi kholomo dzavho. Vho humbulela uri mavemu vho ṱhavha zwifuwo zwavho vha rengisa nama kha vhane vha dzi butshara vha vhuponi havho.

Muṅwe wa vhafuwi, Vho Johanes Ramovha, vho amba zwauri musi vha tshi limuwa zwauri zwifuwo zwi khou tswiwa, vho ḓou ya fhethu afho. Ndi he vha vhona muhumbulelwa masimuni, fhedzi a shavhela maswiswini, he a sia moḓoro wawe. “Ro founela mapholisa, vhe vha swika vha wana goloi yawe i na nama nga ngomu,” vha amba.

Vho Tshikota vho ṱahisa u sinyuwa havho, he vha amba zwauri lutama lwavho lwa uvha mufuwi muhulwane kana wa nṱha zwo tshinyadzwa nga mavemu vhane vha tswa nau ṱhavha zwifuwo zwavho. Vho amba zwauri u tswiwa ha zwifuwo zwi khou anda kha vhupo ha Sinthumule na Kutama. “Rine sa vhafuwi, ri fanela u engedza nḓila dzau tsireledza zwifuwo zwashu. Vhathu avha tsha tswela u ḽa fhedzi. Zwa zwino zwo no touvha vhubindudzi,” vha amba.

Muambeli wa mapholisa Lt-Col Malesela Ledwaba vho khwaṱhisedza zwauri mapholisa vho vhidzwa afho he tshiwo tsha itea hone vha wana masalela a kholomo yo ṱhavhiwaho. Vhafuwi vho humbelwa uri vha khwaṱhisedze arali kholomo iyo i yavho.

Vho Ledwaba vho dovha hafhu vha amba zwauri muhwelelwa wa minwaha ya furaru-mbili, Matumi Mavhungu, o ḓou farwa  he a ḓo uḓi vhonadza khothe ya madzhisiṱiraṱa wa Tshilwavhusiku nga ḽa fumi-mbili Ṱhangule. O vhofhololwa nga beiḽi, hone mulandu wawe wo fhiriselwa phanḓa kha ḽa furaru Ṱhangule. Vho tenda zwauri hu na u anda ha mbilaelo dzine dza ḓiswa malugana nau tswiwa ha zwifuwo fhano Limpopo.

Date:16 August 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 125