Mashudu o khethwa kha thoma ya lushaka lwa vhana vha fhasi ha 17

Tshiṱori nga Kaizer Nengovhela. Ṱhalutshedzo nga Khathutshelo Raliphaswa.

U shuma muthu o ḓi imisela nauvha na mafulufulu zwo ita uri Mashudu “Augreo” Tshiovhe a kane zwihulu musi a tshi khethwa kha thimu ya lushaka ya bola ya milinzhe yavha fhasi ha minwaha ya fumi-sumbe. Mashudu u tambela thimu ya Ramantsha Blackpool FC hone zwa zwino u ḓo nagwa kha thimu ya lushaka ya Afrika Tshipembe.

Mashudu ndimutambi wa Ramantsha Blackpool FC, ye ya fhedza kha khethekanyo ya E kha ḽigi ya Safa Vhembe. Thimu yawe yo fhedza kha vhuimo ha vhuvhili, he Mashudu wa minwaha ya fumi-rathi a bvaho Tshikhwani kha vhupo ha Sinthumule a ḓou ḓi sikela dzina.

Thimu ya lushaka ya fhasi ha minwaha ya fumi-sumbe vha ḓo tamba na thimu ya Lesotho nga ḽa fumi-rathi na fumi-malo Ṱhangule na thimu ya Rwanda nga ḽa fumbili Ṱhangule. Mitambo iyo ndi ya u lugisela mitambo ya vhugwena ya U/17 COSAFA, ine ya ḓo tambiwa nga ṅwedzi wa Nyendavhusiku.

Nga tshifhinga tsha nyambedzano vhege yo fhiraho, Mashudu o amba zwauri u ṱoḓa u takadza vhathu, hone hu na fulufhelo ḽauri u ḓovha mutambi Makone wa thimu ya lushaka ya vha fhasi ha minwaha ya fumi-sumbe. Musi a tshi vhudziswa nga ha ndoro dzawe sa mutambi wa bola ya milenzhe, Mashudu o amba zwauri anga takalela u tambela na Bafana Bafana ḽiṅwe ḓuvha. O ṱahisa zwauri u khethwa hawe kha thimu ya vha fhasi ha minwaha ya fumi-sumbe sa hone mathomo o teaho hau thoma lwendo lwawe. O ḓalelwa nga dakalo uri u muraḓo wa thimu hone oḓi lugela u tamba na thimu kha mitambo ine ya khou ḓa.

O engedza zwauri zwo ḓa a songo zwi lavhelela. “Ndo ḓalelwa nga dzi ndivhuwo ngauri hezwi ndi zwithu zwine mutambi muṅwe na muṅwe azwi tama uri zwi itee khae. Ndo ḓi imisela uri ndi ḓo swika nda guda zwinzhi. Muthu wau thoma e nda mu vhudza hovha mudzulatshidulo wa thimu yashu, Vho Rendani Mutheiwana, sa izwi vhovha vha tshi dzulela u nṱuṱuwedza uri ndi shume ndi sa neti hone ndo khwaṱha. Zworalo, ndo vhona zwo fanela uri ndi dzhie tshikhala itshi ndi tshi shumise. Rine (Blackpool FC) ro no tamba mbambe nnzhi, hone ria awela fhedzi ndia ita dzi nḓowenḓowe musi ndi ndoṱhe. Ndi tevhedza zwe nda ḓi vhetshela sa zwiṅwe zwa zwithu zwine nda fanela u zwi ita ḓuvha ḽiṅwe na ḽiṅwe,” a amba.

Mudzulatshidulo vha Ramantsha Blackpool FC, Vho Rendani Mutheiwana, vho amba zwauri u khethwa ha Mashudu ndi khuliso kha thimu, muṱa wa hawe, Safa Vhembe na tshitshavha nga vhuphara.

Date:15 August 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 117