Tshimangadzo Mufamadi o huliswa kha pfufho dza Global Honoree Authors Awards

Ṱhalutshedzo nga Khathutshelo Raliphaswa

Tshimangadzo Mufamadi, muṅwali wadzibugu a bvaho Hamashau, o huliswa kha pfufho dza vhusumbe dza ṅwaha na ṅwaha dza Global Honoree Authors Awards nga kha bugu yawe ya Tshivenḓa na ya Luisimane, Tsumbunḓila ya murole wa u thoma uya kha wa vhuraru. Vhuṱambo ha pfufho idzo ho farelwa Sandton Library fhaḽa Johannesburg nga ḽa furaru-thihi Fulwana.

Tshimangadzo o ṱahisa zwauri o lavhelesa nga nḓila ine vhagudiswa vha murole wa vhuṋa vha kundelwa u ṅwala nau vhala vha tshe kha mirole ya fhasi. Sa nḓila yau shela mulenzhe khau tandulula khaedu iyo, o ḓou ṅwala bugu ine yovha yo itelwa u thusa vhagudiswa na vhagudisi uri vha kunde khaedu dzine vha ṱangana nadzo.

Dzangalelo ḽawe kha u ṅwala ndi ḽe ḽa thoma e na minwaha ya fumi-sumbe tshikoloni tsha nṱha tsha Ṅwariḓi. “Mugidisi wanga vhovha vha tshi dzulela u vhala zwe nda tou ṅwala he vhavha vha tshi zwi sengulusa vha vhuya murahu kha nṋe, zwe zwa ḓou shela mulenzhe zwihulu kha uri ndi ṱuṱule vhutsila hanga hau ṅwala,” a amba.

Tshimangadzo o ṱahisa zwauri lwendo lwawe kha maṅwalo lwo vha lu songo leluwa sa izwi o ṱangana na dzi khaedu. “Zwiṅwe zwifhinga, ndovha ndi tshi nyamiswa nga zwine vhathu vha amba nga ha maṅwalo na vhaṅwali uri izwi ndi zwithu zwa vhaaluwa. Vhathu vhanzhi avha tendi kha u kona u ṅwala ha vhaswa kana vhathu vhaṱuku,” a amba.

O shuma oḓi funga uri a kunde nau sumbedzisa uri ayo ndi maambiwa fhedzi, atshi tenda uri vhaswa vha nga kona u bveledza mishumo ine ya vhalwa na u shumiswa nga vhanzhi arali vhe na zwishumiswa na ndayo yo teaho. “Arali muthu e na thikhedzo yo teaho, ua kona u bveledza maṅwalo ane a ya anḓadzea a shela mulenzhe kha nḓowetshumo ya maṅwalo,” a amba.

Uri vhana vhane vha kundelwa zwihulu khau ṅwala nau vhala vha nga shumisa bugu yawe, na avho vhane vha kundelwa u amba luambo lwa Luisimane nga nḓila yone. “Bugu yanga yo itelwa u khwinifhadza vhukoni kana vhutsila ha u ṅwala,” a amba.

Tshimangadzo o ṱahisa u takala hawe ngau nwala bugu ya luambo lwa ḓamuni lune vhathu vhanzhi vha ḓo lu pfesesa. “Naho vhone vhane vha sa koni u zwi vhala, vhaḓuhulu vhavho vha ḓo vha vhalela nga nḓila ine vha i pfesesa, a ṱalutshedza. Ṱhalutshedzo ya Luisimane i dovha hafhu ya katela avho vhane avha koni a amba nau ṅwala Tshivenḓa uri vha kone u guda nga ha Tshivenḓa.

U pfufhiwa hetshi tshiphuga zwo ṱuṱuwedza Tshimangadzo uri a bvele phanḓa na u ṅwala. “Ndo ṱuṱuwedzea uri ndi bvele phanḓa nau ṅwala nga ha zwine zwa ḓo shela mulenzhe kha u khwinifhadza matshilo a vhathu nga nḓila dzavhuḓi,” a amba.

Date:14 August 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 111