Muvhango wo vhuya hafhu na vhatambi vhaswa

Tshiṱori nga: Victor Mukwevho. Ṱhalutshedzo nga Khathutshelo Raliphaswa.

Nga murahu ha vhege dzau vhilaela nau kwamea ha vhaṱaleli na vhatambi vha ḽitambwa ḽa Muvhango, vho ḓou pfa vho rulea musi vha SABC 2 na vha Word of Mouth Pictures vha tshi ḓivhadza zwauri ḽitambwa ḽa Muvhango ḽi khou vhuya hafhu kha matambwa a theḽevishini Afrika Tshipembe. Izwo zwo ḓivhadzwa kha vhuṱambo ha tshipentshele he ha farelwa fhaḽa Fourways, Johannesburg mafhelo a vhege yo fhiraho.

Muṅwe wa vhatambi vha kale, e a amba asi ṱoḓe u bulwa dzina, o ṱahisa zwauri vha SABC vho tou lengisa u vusuludza thendela ya ḽitambwa na vhabveledzi zwe zwa sia vha ḽitambwa vha tshi lenga u kanḓisa kana u bvela phanḓa nau bveledzwa ha ḽitambwa. O amba zwauri, “Hu fanela u lugiswa zwine zwa ḓo tamba ho sala miṅwedzi miraru kana miṋa uri zwi tambe. Fhedzi ngauri hovha husina zwe zwa dzudzanywa, vha khasho vho ḓou kombeshedzea uri vha bveledze zwithu zwa murahu. Izwi, zwo ṱangana na u tsa ha mbalo ya vhathu vhane vha ṱalela ḽitambwa, zwo ḓou isa khauri ḽitambwa ḽi khaulwe huu itela u vhulunga dzi mbadelo,” a amba.

Tshililo ubva kha vhaṱaleli, vhe vha vhona u khaulwa ha Muvhango hu nḓila ine ya ḓo humisela murahu u aluswa ha nyambo dza ḓamuni u fana na Tshivenḓa kha theḽevishini, zwo ḓou kombetshedza vha SABC uri vha vusuludze thendela ya vha Muvhango. Zworalo, vhaofisiri vha vhudavhidzani ha lushaka vha Word of Mouth Vho Thanduxolo Jindela na Vho Caroline Phalakatshela vho amba zwauri vhovha vha khou shuma u bveledza mitevhe wa ḽitambwa. Vho ḓou ḓivhadza zwauri Muvhango wovha u khou vusuludzwa nga huswa uri hu ḓiselwe vhaṱaleli puloto ntswa.

Kha tshitatamennde tshe tsha anḓadzwa nga Musumbuluwo, Vho Jindela na Vho Phalakatshelavho amba zwauri vha tshe vho ḓi imisela u alusa mvelele dza Tshivenḓa nau kunga mbilu na maṱo a vhaṱaleli. “Izwi zwi katela u shanduka mvumbo ya ḽitambwa, uvha na tswayo ntswa, uvha na nḓila ntswa dzau thoma ḽitambwa na hone u ḓisa vhabvumbedzwa vhaswa na puloto ntswa,” vha amba.

Kha nḓivhadzo ya vhabvumbedzwa vhaswa hu katelwa na Dr Nonhlanhla Ximba, vhane ha ḓo tamba mutambi a funwaho Leleti Khumalo. Dr Ximba vha khou lavhelelwa uvha mutambi ane a ḓo ḓisa pfiripfiri miṱani ya Muvhango.

Khalaṅwaha ntswa iḓo bveledzela vhaṱaleli lwendo lwa nga ha tshaka dza Afrika. “Ri ramba vhaṱaleli uri vha tshimbile na rine kha lwendo lwashu sa Muvhango hune ra ḓo vha ḓisela zwifhaṱuwo zwiswa nau bvela phanḓa uvha ḓisela zwine vhathu vha zwi ḓivha nga ha Muvhango lwa minwaha ya fumbili-sumbe yo fhiraho,” zwe zwa ṅwalwa kha tshitatamennde.

Vho Duma Ndlovu, mubveledzi muhulwane wa Muvhango, vho amba nga ha tshivhumbeo tshiswa tsha ḽitambwa. “Muvhango Lives On zwi sumbedza mathomo maswa, fhedzi zwi tshi pembela ifa ḽa ḽitambwa. Ri ḓo bvela phanḓa na u tevhedza midzi kana vhubvo ha ḽitambwa ḽashu sa izwi ri tshi ḓovha ri khou ḓisela vhatevheli vhashu na tshanduko inera fulufhela uri vhaṱaleli vhatikedzi vhashu vha ḓo dzulela u zwi takalela sa izwi zwi tshi amba nga ha tshaka dzau fhambana dza Afrika Tshipembe,” vha amba.

Vho Jacqui Hlongwane, ṱhoho ya khasho ya SABC 2, vho ṱahisa havho u takala, he vha amba zwauri: “Sa khasho ya lushaka, SABC yo takalela u vhuya ha Muvhango nga mulenzhe muswa. Ḽitambwa iḽi ndi kale ḽihone hone ḽi thikho ya khasho yashu, zwine ro lindela u vhona ngama mafulufulu maswa, na mitevhe miswa ya ḽitambwa.”

Date:05 August 2024

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 254