Ho wanala goloi ya mapholisa ntha ha ntha ya nndu

Ṱhalutshedzo nga Khathutshelo Raliphaswa.

Munna asa shumi wa fhaḽa Phiphidi o akhamadzwa nga zwe zwa itea muḓini wawe musi tshiendedzi tsha  mapholisa  tshitshi wela nṱha ha ṱhanga ya nnḓu yawe zwe zwa ṱoḓa u tshinyadza nnḓu yawe.

Nndavheleseni Mauda, ane a ḓivhea khwine nga ḽa masipala, ovha o awela nga masiari a Lavhuṱanu ḽa vhege yo fhiraho ya ḽa fumbili-rathi musi a tshi vuswa nga muungo muhulwne. Ori a tshi swika afho atshi ṱoḓulusa uri ho bvelela mini, o akhamadzwa nga u wana uri tshiendedzi itsho tsha mapholisa tsho wela kha ṱhanga ya nnḓu yawe.

Nndavheleseni, ane a dzula e eṱhe, o amba zwauri o vhuya hayani nga masiari o ḓou ḓi awetshela sa izwi ovha o neta. “Ndovha ndo eḓela musi ndi tshi pfa muungo muhulu nau dzinginea ha nnḓu, ndo ḓou vuwa nda ya u sedza zwe zwa itea, he nda tou wana uri tshiendedzi itsho tsha  mapholisa tsho wela kha ṱhanga ya nnḓu yanga, zwe zwa ntsia ndo akhamala nau shushea. Ndo ḓou thusa mureili watsho wapholisa  we avha o huvhala, ngeno muṅwe o bva e na mafuvhalo nyana,” a amba.

Nga murahu o ḓou wana zwauri vhaofisiri avho vha mapholisa vhovha vho ḓisa ḽiṅwalo ḽa ndayo ya tsireledzo kha mudzulatsini wawe. Mureili o sumbedza o kundelwa u langa iyo goloi i sa athu u wetshela kha ṱhanga yawe. “Ndi tshe ndo shushea nau tetemela fhedzi ndi dovha hafhu nda pfa ndi wa mashudu sa izwi ndi songo huvhala hone na vhaofisiri avho vho bva vha songo huvhalesa kana u lozwa matshilo avho,” a amba.

Nndavheleseni o amba zwauri zwo mu dzhiela minwaha u fhedza u fhaṱa nnḓu iyo. “Athi koni u lugisa nnḓu iyi yo tshinyadzwaho. Zwine nda khou ṱoḓa ndi uri mapholisa vha lugise nnḓu yanga, uri ndi kone u dzula muḓini wanga nga mulalo,” a amba.

Zworalo, muambeli wa mapholisa tshiṱirikini tsha Vhembe, W/O Vuledzani Dathi, vho khwaṱhisedza tshiwo he vha amba zwauri ṱhoḓisiso dzi khou bvela phanḓa hune ha khou ṱoḓuluswa mulandu wau reili muthu asina vhusedzi. Vho amba zwauri vhaofisiri avho ndi vhane vha shuma tshiṱitshini tsha mapholisa tsha Ṱhohoyanḓou hone vhovha vhe mushumoni musi tshiwo tshi tshi bvelela.

“Zwo dovha hafhu zwa sumbedzwa zwauri vhaofisiri avho vhovha vha khou reila tshikwarani hone hovha hu na maḓi, zwe zwa ita uri bada i suvhe. Mune wa muḓi hango huvhala, fhedzi mureili wa goloi ya mapholisa o huvhala kha ḽiṱo ḽa tshauḽa. Ovha e na u huvhadzea zwiṱuku khofheni na kha mulenzhe hone o ḓou hwalelwa kiḽiniki ya tsini uri a wane thuso,” vha amba.

Date:02 August 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 162