ADVERTISEMENT:

 
 

Pfariso Julio Nephalama, o fodwa e na mme awe, Vho Sylvia Nephalama, nga murahu hau pfufhiwa digirii yawe Univen. Tshifanyiso: Mazilitha.

Naho zwa dzhia tshifhinga tshilapfu, ni songo litsha u wedza muloro wanu.

 

Ṱhalutshedzo nga: Khathutshelo Raliphaswa.

Arali vha tshi vhona uri u laṱela thaula ndi yone nḓila yau tandulula khaedu dzine vha ṱangana nadzo, avha humbule luvhili na luraru vha ḓi humbudze nga ha lwendo lwe Pfariso Julio Nephalama wa minwaha ya furaru-thihi a lu tshimbila, a tshi wa atshivuwa naho zwithu zwi tshi konḓa. Pfariso ane a bva Vondwe, nnḓanyana ha Ṱhohoyandou u touvha tsumbo yauri u konḓelela zwi ḓisa zwivhuya, izwi ndi ngauri o lindela minwaha ya fumi uri a kone u ṱhaphudza digirii yawe ya minwaha mina

Pfariso o thoma pfunzo dzawe gudedzini ḽa Yunivesithi ya Venda nga ṅwaha wa 2013 kha buḓo ḽa Bachelor of Science in Agricultural Economics, a fhedza nga ṅwaha wa 2023. Nga tshifhinga tsha musi atshi pfufhiwa digirii yawe ngei Univen, ovha o ḓala nga dakalo.

Pfariso, ane avha mudzulatshidulo wa dzangano ḽa dzulapo(sanco) ya Vondwe, ndi ene muthu wa u tou thoma u wana digirii i bvaho yunvesithi kha muṱa wa hawe wa vhana vha sumbe. Kha nyambedzano ye avha nayo na vha Limpopo Mirror, Pfariso o amba zwauri naho lwendo lwawe lwa pfunzo lwovha lu konḓaho, u tou takala uri o fhedza o swikelela he avha a khou ṱoḓa u swika hone kha sia ya pfunzo. “Ndo ṱhaphudza murole wa vhufumi-na-mbili kha tshikolo tsha nṱha tsha Tshidimbini nga ṅwaha wa 2012, hone ndovha ndi sa kholwi uri lwendo lwa pfunzo i touvha nndwa hone yanga nndwa i ḓovha ya minwaha ya fumi.

Kha minwaha heyi ya fumi musi ndi Univen ndo feila thero dzanga lwa tshivhalo, fhedza nda dovholola ndi sa vhilaeli ngauri ndovha ndi tshi ḓivha zwine nda ṱoḓa vhutshiloni. Ndori musi ndi tshi ṱoḓa u laṱela thaula, nda humbula nga tshifhinga tshine ndo no tshi fhedza, zwa nṱuṱuwedza uri ndi bvele phanḓa na pfunzo dzanga,” a amba.

Uri nga zwifhinga zwa musi a tshi thoma ngei Univen, ovha wa mashudu a wana ndambadzo, mashudu mavhi a xetshelwa ngayo sa izwi ovha a sa khou shuma zwavhuḓi kha thero dzawe. “Mmeanga, Vho Sylvia Nephalama, vhane zwa zwino avha shumi, vhovha vha tshi shuma kha zwa EPWP vha dovha hafhu vha shuma u bika tshikoloni tsha fhasi tsha Vondwe na tsha Guma Technical School. Naho vhovha vha tshi hola muholo muṱuku, vhovha vha tshi ḓi nthumela yeneyo ṱhukhuṱhukhu uri vha kona u badelela pfunzo dzanga sa izwi ndovha ndo xetshelwa nga gavhelo la tshikolo. Ndi dovha hafhu nda livhuwa Phurofesa Vho Khangwelo Desmond Musetsho, murangaphanḓa wa kusi kwashu, Vhamusanda Vho Gumani Rammbuda, na vhaṅwe vhanzhi u fana na ṱhama dzanga vhe vha ntikedza kha minwaha iyi ya fumi ya lwendo lwanga lwa pfunzo. Zwa zwino ndo ṱangana na khaedu ya u ṱoḓa mushumo, fhedzi ndi tenda zwauri ndi ḓovha wa mashudu husi kale kha sia la mushumo,” a engedza.

Murangaphanḓa wa siala, Vhamusanda Vho Gumani Rammbuda, vho amba zwauri vha ḓi kukumusa nga Pfariso na zwe a kona u swikelela hone vha mu tamela zwivhuya fhedzi. “Lwaminwaha, ndovha ndi tshi mu vhidza pfamoni uri ndi mu kaidze nga u vhona zwine zwa khou itea kha pfunzo dzawe. Ndovha ndi tshi mu vhudza zwauri u khou rangaphanḓa tshitshavha nga nḓila yavhuḓi, fhedzi u fanela u lugisa hutshilo hawe uri a kone uvha tsumbo yavhuḓi kha vhare murahu. Ndo takala vhukuma uri o dzhia ngeletshedzo yanga ai shumisa, ndi ngazwo namusi ri tshi pembela nae,” vha amba.

 

Date:28 May 2024

By: Khathutshelo Raliphaswa

Khathutshelo Prudence Raliphaswa started her journey in the media industry by studying Media Consultancy at Boston College in 2018. She continued her studies in journalism at IIE Rosebank College and graduated in 2022. Her passion is to be creative with words and tell stories in a more detailed way. She started as an intern at Limpopo Mirror in 2023 and is primarily responsible for the translations into Tshivenda..

Read: 146

 

ADVERTISEMENT

 

ADVERTISEMENT:

ADVERTISEMENT:

 

Recent Articles

ADVERTISEMENT