Thovhele Nngwedzeni Mphaphuli vho dzama.

Tshiṱori nga: Silas Nduvheni. Ṱhalutshedzo: Khathutshelo Raliphaswa.

Vha muṱa wa ha Mphaphuli na mivhundu ya Hatshikonelo vha khou lila zwi tshi tevhela u dzama ha Thovhele Nngwedzeni Mphaphuli. Thovhele vho dzama vhe hayani havho musanda nga Lavhuraru ḽa malo Ḽara, vhe na minwaha ya fusumbe-ṱahe, nga murahu ha u lwa na vhulwadze lwa tshifhinga tshilapfu.

Thovhele vho bebwa Hatshikonelo, vhe vhone ṅwana wa u thoma wa Thovhele Stefanus Tshikonelo Mphaphuli, vhe vha dzama nga ṅwaha wa gidiḓaṱahe fuṱahe-raru. Lwendo lwavho lwa pfunzo lwo thoma tshikoloni tsha fhasi tsha Mukula, vha konou dzhena Arabies tshikolo tsha vhana vha musanda ngei Marble Hall. Vha bvela phanḓa na ngudo dzavho tshikoloni tsha nṱha tsha Mphephu, musi vha tshi dzula musanda wa Dzata.

Muambeli wa khoro ya musanda wa Mphaphuli ngei Hatshikonelo, Vhamusanda Sam Mphaphuli, vho ṱahisa Thovhele sa munwe wa Vho Thovhele vhe vha vha vho ḓi imisela u shumela mivhundu yavho. “Nga tshifhinga tshavho tsha u rangaphanḓa havho vho ḓi imisela u alusa na u bveledza mivhundu yavho. Vhovha vhe murangaphanḓa vhare na lufuno, u ḓi ṱukufhadza na u fara vhalanda vhavho u fana,” vha amba.

Nga murahu ha u shuma kha muhasho wa vhulimi u swika vha tshi notha nga ṅwaha wa gidiḓaṱahe fuṱahe-iṋa, vho ḓou twa sa Thovhele wa mivhundu ya Tshikonelo. Vho rangaphanḓa mivhundu ya fumi-na-raru fhasi ha khoro ya musanda wa Tshikonelo. Nga u vhona khaedu dzire hone kha mivhundu iyo sa izwi hu vhupo vhu shayaho, vho ṋea vhalanda vhavho hekhithara dza ḓana-na-iṋa ya bulasi yavho hu u itela u tikedza mishumo ya vhulimi.

Vho Basikopo Makamu, vhane vha vha MEC wa u shumisana kha vhulangi, nzulelo ya vhathu, na zwa sialala, vho isa ndiliso dzavho kha vha muṱa na mivhundu ya Tshikonelo. “Vhege dzo fhiraho dzovha dzi konḓaho kha muhasho na vunḓu ḽa Limpopo, sa izwi ro xelelwa nga Vho Thovhelo vhanzhi. Ro ḓi imisela u tikedza vha muṱa kha zwifhinga izwi zwi konḓaho,” vha amba.

Thovhele Nthumeni Masia vha ofisi ya vhuhosi ha Vhavenda vho hulisa Thovhele nga uvha murangaphanḓa vhe vha vha vha tshi ranga vhalanda vhavho nga nḓila ya ṱhonipho na lufuno.

Thovhele vha ḓo swithwa tshiendeulu Hatshikonelo nga Ḽavhuṱanu ḽa fumi-na-sumbe Ḽara.

Date:17 November 2023

By: Silas Nduvheni

Read: 286