Vhadzulapo vha tsini na Mphephu Resort vha ṱoḓa u vusuludza Mphephu Resort.

Tshiṱori nga: Maanda Bele. Ṱhalutshedzo nga: Khathutshelo Raliphaswa.

Lwa vhege mbili dzo fhiraho, vhadzulapo vha swikaho vha fuṱhanu vha Nzhelele vhovha vha kha fulo ḽa u vusuludza Mphephu Resort uri i shumiswe hafhu. Fhedzi naho zworalo, vha muhasho wa mveledziso ya ikonomi, vhupo na vhuendela mashango wa Limpopo (LEDET) vhari a vhango nea thendelo uri vhadzulapo avho vha shume u vusuludza Mphephu Resort.

Mphephu Resort yo tshinyadzwa nga mvula ye ya na nga Luhuhi nga ṅwaha wa gidimbili gumbili-thihi, u bva ṅwaha uyo ahuna we a lingedza u lugisa themamveledziso afho.

Musi vha Limpopo Mirror vha tshi dalela Mphephu Resort vhege yo fhiraho, munwe wa vhadzulapo vhe vha vha vha khou shuma afho, ori u na fulufhela ḽauri musi hu tshi fhedza u vusuludzwa, ha shuma u ḓovha na tshikhala tsha u wana mushumo. “Zwi a konḓa u wana mushumo. Sa izwi ri khou vusuludza Mphephu Resort, ri na fulufhelo uri zwi ḓo ri sikela mishumo,” u amba izwi e kati na u shuma tsini na bambelo ḽa Mphephu Resort.

Vho Phathutshedzo Mukhaninga, vhane vha vha vhone murangaphanḓa wa tshigwada tsha vhathu avho vhane vha khou shuma, vhari vho takala vhukuma uri vhathu vho swika nga vhunzhi. “Ndi kale vha muvhuso vha khou amba uri vuk’uzenzele (ri vuwe ri ḓi itele), zwine ndi zwine ra khou ita. Ri na fulufhelo ḽauri arali zwithu zwoṱhe zwa tshimbila zwavhuḓi, hu nga vulwa hafhu nga ṅwedzi zwa Nyendavhusiku ṅwaha uno. Ri a livhuwa uri vhadzulapo vho vhona zwi zwa ndeme u vusuludza vhufa hashu havhuḓi,” vha amba.

Vhadzulapo vha sumbedza vha sa ḓivhi uri mune wa Mphephu Resort ndi vha musanda wa Mphephu-Ramabulana kana vha LEDET.

Muambeli wa muṱa wa musanda wa Mphephu-Ramabulana, Vho Ntsieni Ramabulana, vho bvisela vhathu khagala kha izwo. “Mphephu Resort ndi ndaka ya vha LEDET. Ndi kale vha muṱa wa musanda ri khou humbela muvhuso uri vha ḓe vha lugise Mphephu Resort sa izwi zwi tshi ḓo vhuedza vhupo hashu kha sia ḽa ikonomi. Ri dovha hafhu ra takalela u ḓivha arali vha muhasho vha na maano a u ri thusa u vusuludza vhupo hashu. Naho ro tshi pfesesa u sinyuwa ha vhadzulapo, ri fanela u dzulela u shumisa milayo kha zwoṱhe zwine ra ita. Muvhuso u fanela u ṱavhanya wa tandulula nyimelo iyi,” vha amba.

Muambeli wa MEC LEDET, Vho Callies Matlala, vhari muhasho a ungo ṋea vhathu thendelo uri vha vusuludze Mphephu Resort. “Ro vhudzwa nga ha vhadzulapo vhane vha khou shuma vhuponi uho. Rari ri tshi vhudzisa vha khoro ya musanda vhari navho vho vha vha sa zwi ḓivhi,” vha amba.

Vho Matlala vhari vha LEDET vho laedza vha muhasho wa vhashumi vha tshitshavha na themamveledziso (DPWI) vha Limpopo uri vha ye u ṱola nyimele ya vhupo uho. “Zwi nga dzhia minwedzi ya fhasi ha ya fumi-mbili uri mushumo uyo wa vha DPWI u fhele. Zworalo, mushumo wa u vusuludza Mphephu Resort u nga fhela nga murahu ha minwaha miraru, izwi zwi ḓo konadzea vho sedza na mugaganyagwama ure hone,” vha engedza.

Date:06 November 2023

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology.

He is passionate about current news and international affairs.

He worked as part of the Zoutnet team as an intern in 2017.

He is currently a freelance journalist specialising in news from the Vhembe district.

Read: 254