Vhakhantseḽara vha khou eletshedzwa nga u shumisa zwileludzi zwa vhudavhidzani.

Tshiṱori nga: Musina News. Ṱhalutshedzo nga: Khathutshelo Raliphaswa.

Vha vhulangi ha vhudavhidzani muvhusoni (GCIS) vunḓuni ḽa Limpopo, Vho Thanyani Ravhura, vho ita khuwelelo kha vhaofisiri na vhakhantseḽara vha muvhuso uri vha fanela uvha na vhusedzi kha nḓila dzavho dza u shumisa zwileludzi zwa vhudavhidzani. Vhari vhupfiwa havho vhunga vhoniwa sa vhupfiwa ha muvhuso une vha u imelela tshitshavhani.

Vho Ravhura vho amba izwi kha muṱangano wa vhakhantseḽara nga ha vhudavhidzani, nyandadza mafhungo, na nḓila dza u tshimbidza zwithu we wa farelwa khoroni ya masipala wapo wa Musina nga Ḽavhuṋa ḽa fumi-ṱahe Tshimedzi.

Muṱangano uyu wovha u wa u thusa vhakhantseḽara kha nḓila dzine vha dzi shumisa u davhidzana na vhakhethi vhavho na vha nyanḓadza mafhungo, uri vha kone u pfesesa nḓila dza u shuma zwavhuḓi na vhathu na muvhuso.

Vho Ravhura vhari zwileludzi zwa vhudavhidzani zwi na maanḓa a u kona u swikisa mafhungo kha vhathu vhanzhi nga tshifhinga tshithihi kana tshiṱuku. Fhedzi naho zworalo, arali vha zwi shumisa vha si na vhusedzi, zwi ngavha na masiandaitwa a huvhadzaho vhadzulapo na muvhuso. Vhari: “Vhakhantseḽara ndi vhone vharangaphanḓa vhane vha fulufhelwa nga vhadzulapo, vha fanela u khwaṱhisedza mafhungo na zwidodombedzwa vha sa athu u zwi anḓadza kha zwileludzi zwa vhudavhidzani zwo fhambanaho. Tshirunzi tsha murangaphanḓa na muvhuso tshi a nyadzisea arali vha anḓadza mafhungo ane asi a vhukuma kha zwileludzi zwa vhudavhidzani.”

Vho Ravhura vho engedza uri vhakhantseḽara vha fanela u shumela tshitshavha na u bveledzisa mivhundu vha sa sedzi dzi khuḓano dzavho na minwe miraḓo ya khoro. “A vha faneli u sedza ḽihoro ḽine vha wela khaḽo, vha fanela u shumela tshitshavha. Mishumo ya muvhuso i itelwa u bveledzisa na u fhaṱa mivhundu. Vha na vhuḓifhinduleli ha u dzulela u ambedzana na vhadzulapo nga ha zwine zwa khou bvelela misi yoṱhe,” vha amba.

Date:31 October 2023

By:

Read: 260