Run Boikie o fhedza lwendo lwa u bva Kapa u ya Musina.

Tshiṱori nga: Vha Cycling. Ṱhalutshedzo nga: Khathutshelo Raliphaswa.

Boike Monareng a bvaho Bela-Bela, ane a ḓivhea khwine nga ḽa Iron Strong Man kana Run Boike Run, o fhedza lwendo lwawe lwa u reila lukanyakanya ubva  Cape Town lwakilomitha dza 1.923km. Lwendo ulwo lwo thoma ḓoroboni ya Kapa u swika ḓoroboni ya Musina, hone ndi tshipiḓa tsha u alusa masheleni a khunguwedzo ya zwa mutakalo wa muhumbulo.

Monareng wa minwaha ya fuina-mbili o takuwa Kapa nga Musumbuluwo wa ḽa ṱahe Tshimedzi, hone ovha o ḓi gana u fhedza lwendo ulo nga maḓuvha a fumi fhedzi. O ḓou shuma zwavhuḓi lwe a fhedza maḓuvha a ṱahe fhedzi, a swika Musina nga ḽa fumi-sumbe Tshimedzi. U fhedza lwendo nga maḓuvha ayo a ṱahe zwo ḓisa dakalo ḽihulu khae, lwe ari a tshi swika a vha akhou setshela tshifhaṱuwo tsho ḓala dakalo. Munwe wa vhathu vhe vha mu ṱanganedza ndi vho Neḓorobo ya Musina, Vho Nkhanedzani Godfrey Mawela, vhe navho vha sumbedza vho takala vhukuma nga u swika hawe.

Lwa minwaha miṱanu yo fhiraho, Monareng ovha a khou ḓi dzudzanyela lwendo ulu. Ovha a khou toḓa u ya Kapa nga bisi a konaha u vhuya nga u reila lukanyakanya, fhedzi munwe muthu wa mbilu ya vhuthu a mu ṋea thikhithi ya u namela bupho u ya Kapa. Zwe zwa mu ṱuṱuwedza ndi u takaleliwa nga vhathu vha mivhundu na dzi ḓorobo dze a pfukha khadzo a tshi humela Musina. “Ndovha ndi sa zwi ḓivhi uri ndi a takaleliwa nga vhathu vhanzhi, u vhona hanga vhathu vhanzhi vha tshi sumbedza u takala vha tshi mmbona ndi zwe zwa nṱuṱuwedza na u ntakadza uri ndi kone u reila ndo ḓi nekedzela. Zwi sumbedza lufuno kha nne,” a amba.

Manareng u tama u livhuwa vhathu vhoṱhe vha vha mu tikedza, na vhalambedzi vhe vha mu nea vhulalo, zwiḽiwa na zwiṅwiwa musi e nḓilani kha maḓuvha ayo a ṱahe. We a ḓa a thoma u reila lukanyakanya ndi Nakedi Masehla, we a mu wana Pretoria a swika nae Musina hu nḓila ya u mu ṱuṱuwedza kha lwendo lwawe. O dovha hafhu a livhuwa na vha muhasho wa mutakalo vhe vha vha vhe nae kha lwendo lwawe.

Monareng a si mureili wa lukanyakanya, u dovha hafhu avha mugidimi wa muṱaṱisano wa Combrades na uvha mubambeli, hone u na mimendele i swikaho zwigidi zwiraru kha mitambo iyo yoṱhe. Nga ṅwedzi wa Lambamai ṅwaha uno, o gidima lwa khiḽomitha dza maḓana mana, u bva Beitbridge Border Post u swika Bela-Bela, nga maḓuvha mana.

Zwa zwino u khou ḓi lugisela u reila lukanyakanya u bva Igipita u swika Musina kha lwendo lwa 5,000km. “Ndi lwendo lwa tshikhala tshilapfu, fhedzi ndi a zwi ḓivha uri ndi ḓo zwi kona sa izwi ndo kona u bva Kapa u swika Musina. Zwine nda ṱoḓa ndi vhalambedzi vhane vha ḓo nthusa u alusa masheleni a tshiimiswa tsha Run Boikie, ine ya vha na ndivho ya u vhudza tshitshavha nga ha mitakalo ya muhumbulo,” a amba.

Date:27 October 2023

By:

Read: 227