Ho wanala mufumakadzi o vhulawa Khwekhwe.

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Vhadzulapo vha kusi kuṱuku kwa Khwekhwe, nnḓa nyana ha Tshitandani, vho shushwa nga masinḓambilu mafhelo a vhege yo fhiraho musi hu tshi wanala mufumakadzi o vhulawa. Izwi zwi swikisa tshivhalo tsha vhathu vhe vha vhulawa kha vhararu ho vhalwa ṅwedzi uyu fhedzi.

Nga ḽa malo Tshimedzi, ho wanala musidzana wa minwaha ya fumi-sumbe ,Ondwela Mulelu o lovha nga zwine ha humbulelwa uri o shelelwa mulimo nga mufunwa wawe, Orinea Mangwane, we avha e nae afho lufherani he a wanala hone o ḓi haṱula vhutshilo nga u ḓi vhofhela na ṱhanga nga thambo. Izwo zwo itea Dzwerani.

Tshitumbu tsha mufumakadzi uyu we a wanala Khwekhwe, ndi tsha Mpho Netili, hone o wanala o tou ambara zwiṱuku. O wanala nga Sondaha ya ḽa fumbili-mbili Tshimedzi, nga masiari nga muthu we avha a khou tou fhira nga bada.

Netili, wa minwaha ya furaru-raru, ovha e ramabindu a ḓivheaho na muraḓo wa vhuṱhogwa wa ḽigi ya vhafumakadzi ya ANC. Muofisiri wa vhudavhidzani Vhembe, W/O Vho Vuledzani Dathi vho khwaṱhisedza tshiwo, ho vulwa mulandu wa bulayo. Tshivhangi tsha bulayo iḽi a tshi ḓivhei, fhedzi mapholisa vha khou ita tsedzuluso dza bulayo iḽo.

“Rori ri tshi wana muvhigo nga ha tshiwo, mapholisa vha ya afho muḓini he a wanala hone, he avha o tou eḓela nga muṱana. Hovha hu na mbonzhe dzi vhonala, hone na malofha a khou bva nga dzi ningo. We a khwaṱhisedza uri ndi Mpho Netili ndi khaladzi awe, Tshifhiwa Netili. Netili o guma u vhoniwa e fhethu ha u ṅwa zwikambi nga Ḽavhuṱanu ḽa fumi-ṱahe,” hu amba Vho Dathi.

Mukhantselara wa ward 3 ya Masipala wa Makhado, Vho Lutendo Phangami, vhe vha vha khou thusa vha muṱa u thoma nga ḓuvha ḽe tshiwo tsha pfala, vho ṱahisa u shushea ha vhadzulapo. “ Asi kale ro xelelwa nga musidzanyana we a sia ṅwana wawe, zwa zwino ndi tshiwo itshi tsha masinḓambilu. Ri khou xeletshelwa nga vhaswa vhanzhi vhane ndi vhone vharangaphanḓa vha matshelo. Zwine zwa vhavha ndi uri vha khou tou vhulawa. Rine, sa vharangaphanḓa ro vhaisala vhukuma. Netili ovha e muunḓi hahawe. Zwa zwino muṱa wosala vhusiwanani. Ri khou dovha hafhu ra balelwa nga masheleni a u mu vhulunga nga khuliso,” vha amba.

Vho Dathi vha khou ita khuwelelo kha vhadzulapo uri vha shumisane na mapholisa uri hu kone u fariwa vhapondi. “Muiti wazwo ha athu u wanala. Muthu are na vhuṱanzi vhune ha nga thusa mapholisa, u khou humbelwa uri a ise muvhigo kha muofisiri wa tsedzuluso Sgt Vho Thivhusiwi Charles Mabai, kha 076 323 5221 kana kha 015 583 7400,” vha amba.

Date:27 October 2023

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 317