Lidzhakanḓila Vho Ratshilumela Stranger Ravele vho lovha.

Tshiṱori nga: Silas Nduvheni. Ṱhalutshedzo nga: Khathutshelo Raliphaswa.

Vha vhuhosini ha Ravele na miraḓo ya nḓowetshumo ya u hasha kana u mvumvusa vhathu nga radio vha khou lila zwi tshi tevhela u fhira fhano shangoni ha muofisiri wa kale wa thengiso na khunguwedzo kha khasho ya rasio Thohoyandou na Phalaphala FM, Vho Ratshilumela Ravele vhe vha vha vha tshi ḓivhea khwine nga ḽa Vho Stranger Ravele.

Ravele vho lovha vhe na minwaha ya fusumbe-thihi. Vhovha vha tshi dzula Thohoyandou Block P East, hone vho lovhela MediClinic ya Bulugwane nga Sondaha ya ḽa fumbili-mbili Tshimedzi, nga murahu ha u lwa na biso ḽa tshifhinga nyana.

Vho bebwa vha aluwa musanda wa Ravele Matsheketsheke kusini kwa Mauluma, vhuponi ha Nzhelele. Uya nga muambeli wa muṱa, Vho Bethuel Ravele, vhari Vho Stranger Ravele vho vha muraḓo wa Radio Thohoyandou musi itshi sikwa nga ṅwaha wa gidiḓaṱahe fumalo, he vha vha muofisiri wa thengiso na khunguwedzo. Vho shuma na vhathu vha fanaho na mubishopho Isaack Dagada (vhe vha fhedza vho vha mulanga tshiṱitshi), munnaavhane Vho Victor Ravhuanzwo vhe vha vha vhe mulangi wa thengiso na khunguwedzo, Vho Russel Tshiendangolo Mashige na vhanzwe vhanzhi.

“Musi Radio Thohoyandou i tshi ṱanganywa na Radio Venda (ine namusi ya vhidzwa Phalaphala FM) nga ṅwaha wa gidiḓaṱahe fuṱahe-ṱahe, vha tou awela, fhedzi vha dovha hafhu vha humela tshiṱitshini hafhu nga ṅwaha wa gidimbili-iṋa he vha shuma sa muofisiri wa thengiso na khunguwedzo, u swika vha tshi notha nga ṅwaha wa gidimbili-fumi,” hu amba Vho Bethuel.

Ravele vha ambiwa sa muthu we vha vha vha tshi shuma vho ḓi imisela na u ṱanganya miraḓo ya musanda wa Ravele Matsheketsheke. “Muphuresidennde wa kale wa lushaka lwa Venda, Khosi Vho Nndwakhulu Frank Ravele, vhari vha lushaka lwa Muzila vha kusi kwa Tshamulungwi, Harammbuda, Mutale, vho vha vha tshipiḓa tsha lushaka lwa Ravele. Vho Stranger vho kona u ṱanganya lushaka lwa Ravele Matsheketsheke na lwa Muzila uri rivhe muṱa muthihi muhulwane,” vha engedza.

Vho Stranger vho sia mufumakadzi, Vho Pauline Moloko, na vhana vha rathi, Phophi, Vele, Mashau, Khathutshelo, Irene na Marubini. Vha ḓo vhulungelwa Tshiendeulu Haravele Barotha, kusini kwa Mauluma. Fhedzi zwa zwino tshifhinga a vha athu u amba.

Date:27 October 2023

By: Silas Nduvheni

Read: 305