A vha ri tendele ri vusuludze Mphephu Resort.

Tshiṱori nga: Maanda Bele. Ṱhalutshedzo nga: Khathutshelo Raliphaswa.

Mphephu Resort ire fhaḽa Nzhelele, ine zwa zwino ya langiwa nga vha muhasho wa ikonomi, mveledziso, vhupo na vhuendela mashango wa Limpopo (LEDET), ndi ine yovha i tshi touvha vhupo honehone ha u awela he havha hu tshi kunga vhathu vha kule na tsini.

Fhethu afho hu wanala fhasi ha thavha ya Tswime, hune ha ṱanganya Siloam, Sendedza, na Mahlarini. Musi hu tshe ho ima zwavhuḓi, hovha hu tshi kunga vhathu vha kule nga zwithu zwi fanaho na fhethu ha u bambela ha maḓi a dudelaho, mabambelo o ḓoweleaho mavhili, tshisima tshi fhisaho, phaka khulwane, na phera dzo kunaho dza vhaeni. Hovha hu fhethu ho nakaho maṱoni a vhanzhi, ho tangiwa nga ngande yo nakaho, hone yo ṱhogomelwaho nga nḓila yavhuḓi. Hovha hu tshi dovha hafhu havha fhethu ha u farela miṱangano, na mabepha a u mvumvusa vhathu.

Mphephu Resort ndi ye ya vulwa nga ṅwaha wa gidi-ḓaṱahe fumalo-ṱahe nga muphuresidennde wa kale wa lushaka lwa Vhavenda Vho Frank Ravele, vha sa athu u sudzuluswa khavhuimo uvho. Nga Lambamai gidimbili-ṱahe, muphirimia wa kale wavundu wa Limpopo Vho Ngoako Ramatlhodi vho anḓadza nga ha u vusuludzwa ha Mphephu Resort, fhedzi naho zwo ralo, zwithu a zwingo tshimbila zwavhuḓi.

Nga ṅwaha wa gidimbili fumbili-thihi, ho a mvula ye ya tshinyadza vhukuma ya wisa na buroho ḽe vhathu vhavha vha tshi shumisa u rathela Mphephu Resort, mashudu mavhi a hungo lugiswa buroho iḽo. Fhethu afha zwa zwino hu kha tshiimo tshine a tshi takadzi. Hu vhonala vhunzhi ha zwithu zwo no tshinyadzwa, ngande dzo no oma luhatsi nga u sa ṱhogomelwa, hone mabambelo o no oma maḓi.

U valwa ha Mphephu resort a zwingo kwama ikonomi yapo fhedzi, zwo dovha hafhu zwa kwama vha nḓowetshumo ya vhumvumvusi. Vha tshi khou ambela vhadzulapo, Vho Samuel Lusunzi vho ṱahisa vhupfiwa ha vhadzulapo vhari vha pfa vho ṱukufhadzwa na u vhaisala nga u furalelwa ha resort iyo. “A vha khou ṱhonifha vhufa. Fhethu afha ndi vhuḓikukumusi hashu na u kunga vhaendela mashango. Hovha hu tshi ṋea vhaswa nḓivho u bva kha vhalala, u fana na hune maḓi a fhisaho a bva hone. Zwa zwino ri endela vhunwe vhupo hu fanaho na Durban u ḓi mvumvusa, fhedzi ri ṱoḓa uri vhathu vha ḓe kha rine u ḓi mvumvusa na u ḓi takadza nga vhupo hashu,” vha amba.

Vho Lusunzi vhari Mphephu Resort i na ḓivhazwakale yavhuḓi, hone ho no swika na vhaḓivhalea vha fanaho na Brenda Fassie, Arthur Mafokate, na vhanwe vhaḓivhalea vha madzhakanḓila khasia la muzika.

“Vhana vhashu vha vho fanela u ya kule uri vha kone u bambela, vho sia fhethu hashu havhuḓi. Zwa zwino ro ṅwala ḽinwalo ra rumela kha MEC, Vho Rodgers Monama, ri tshi vha vhudza nga ha maano e ra a ita hu u itela u vusuludza fhethu hashu. Sa vhadzulapo ri na vhukoni ha u vusuludza vhupo hashu. Ri na vhalindi vha tsireledzo, vhabiki makone, vhalangi, na vhaṅwe vhanzhi. Vhadzulapo vha vhupo ha Vhembe vha nga zwi kona u vusuludza vha langa hu si na thuso ya muvhuso,” vha amba.

Muambeli wa LEDET, Vho Zaid Kalla vhari muhasho wa vhashumi vha tshitshavha vho ita ṱhoḓisiso nga vhuḓalo, zwi tshi kwama masheleni a u lambedza. “Ndambedzo i ḓo ri konisa u vhea vhathu vho teaho uri hu vusuludzwe, u fana na vhafhaṱi, ṱholi dza mavu, na vhanwe vhanzhi. Nga murahu, ri ḓo konaha u ita khumbelo kha vha Treasury nga ha ndambedzo ya u thoma u vusuludza,” vha amba.

Date:24 October 2023

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology.

He is passionate about current news and international affairs.

He worked as part of the Zoutnet team as an intern in 2017.

He is currently a freelance journalist specialising in news from the Vhembe district.

Read: 280